27 March 2012

Roger Roger

Breaker… Triple Charlie break…

Anyang anak ku pa (actually ali ku pa naman antita katwa ngeni) kaluguran kula reng mag radyu na taga kekami. Ali radyung AM/FM ne. Itang bala walkie talkie. Detang bala  gagamitan da reng security guard. 

Nyang mumuna kung mebyasa maki gamit kami mung Triple Oscar (wali ku). Aku mandam  ku kang KDK na kapatad ng Triple X (pane yang maka sapatus ita maski atyu bale da). Kaybat mekasali ku ring kanaku na pisali ng MET. Telakad de ing antena ku king bale. Nanu ne kasi call sign itang mengabit kung antena? Basta balu ku magobra ya Pelco (itang mangye ya pero super friendly). Iya ngan ing sinali kareng gamit at kebit ne pa (kaganaka na ne?)

Oita nyang mebyasa kung megradyu, kanita ku mebyasang magpuyat. Ikami kami mu kanyan ing misabi sabi hanggang ganingaldo. Madalas kasi ikaming KDK panalukyan mi ya mu i Triple X (koya na) kareng kasabi na. Enabalu pakiramdaman miya (at neng gandus at syempre ali ku pweding sabyan keni nang dimdam mi.. haha!) . Kaybat potang abak na, miyabe abe na kami nanaman. Bala mikakapatad kami.

Potang tin maki eye-ball (makikit) kareng kaluguran mi.. syempre tutuki kami pero ali kami papakilalang mag radyu.. One way.. Ibig sabyan, ila balu mila, ikami ali da kami. Kapamurayit mi ne? Aliwa naman ikaming kasabi da kaya ali na kami pakilala. 

Dakal mu ring loveteam kareng kaluguran mi. Syempre poporma la kaya pane lang mag treat. Ikami pane nake man chaperone (syempre libre). Antimo pag mag pacute ya i Panyero kang AM7 ampo kang KEPS, tutuki kami. Pane kami kanita manukan king San Matias.


Nyang misan menagkat lang mag beach, syempre tinuki nake nanaman (atin ya pang bwak i QUQ kanita). Kareng loveteams na abe mi kanita.. deng aliwa mika tuluyan la, deng aliwa ali la. 

Nyang metwa naku (metwang bagya mu ne!) mag radyu ku ulit, aba i LOR na ing akilala ku. Apin iya ing Queen of Modulators kekami (labyu LOR). Pero makigamit nakung radyu kanita kang kang VKY or kang Regie (nanu ne kasi call sign i Reg?). Masikan ya ing set-up na kaya meging jammer naku man. Ali jammer na singer or dancer ne. Itang mangulu mu potang atin misasabi. Bad  ne? 


2011 reunion

Dakal nang mengalabas a panahun. Dakal nang mengalagas a bwak (peace QUQ). Pero ing pamikaluguran mi atyu pamurin.

Triple Charlie.. Signing off


2 comments: